Partia Demokratike e Kosovës (PDK) dhe Lidhja Demokratike e Kosovës (LDK) do të marrin pjesë në takimin e thirrur nga Presidentja Vjosa Osmani në të cilin do të diskutohet për zgjedhjet në veri.
Në një përgjigje për Demokracia.com, anëtari i Kryesisë së LDK-së, Xhafer Tahiri, ka konfirmuar se LDK do të marrë pjesë në këtë takim.
“Po do të marrim pjesë, do të shkojë sekretari Imri Ahmeti”, tha Tahiri.
Demokracia.com ka mësuar se edhe PDK do të marrë pjesë, në takim do të shkojë nënkryetarja Vlora Çitaku.
Ndërsa në herët, në një përgjigje për Demokracia.com, drejtori për Informim i AAK-së, Lulzim Blaka tha se kjo parti që nga fillimi ishte kundër mbajtjes së zgjedhjeve në veri, pasi që sipas tij, nuk është momenti i përshtatshëm për mbajtjen e tyre.
“Qëndrimi i AAK për zgjedhjet në veri, që nga fillimi kur është hapur kjo temë, ka qenë që ato të shtyhen, sepse kemi vlerësuar se nuk është momenti i përshtatshëm për mbajtjen e tyre. Ky është qëndrimi jonë që e kemi bërë publik në shumë raste e deklarata, tash e sa kohë”, tha Blaka.
Osmani pret sot në ora 14:30 partitë politike për konsultim lidhur me zgjedhjet komunale në: Mitrovicë të Veriut, Leposaviq, Zubin Potok dhe Zveçan.
