Deputeti i Lidhjes Demokratike, Agim Veliu, s’u përfshi në listën e këtij subjekti për zgjedhjet parlamentare, për çka thotë se ndihet keq që vendi ku kaloi krejt karrierën e anashkaloi.
Për këtë, ky me faj e sheh kryetarin e Kryesinë që siç thotë ekskluzivisht për Klan Kosova, bënë skenarë kundrejt tij me orkestrimin e dy figurave të larta shtetërore.
Ish-ministri i Brendshëm kritikon kastën e vjetër në parti që s’i dolën në krah kur iu bë padrejtësi, e të cilët ishin më keq se ky në elektorat.
Bile këtij s’ia mbush syrin as slogani e, siç thotë, tjetërsimi i vizionit të LDK-së, ndaj s’pret se do dalë si e para.
Pavarësisht të gjithave, ish-kreu i Podujevës është këmbëngulës e nuk heq dorë nga partia, degën e së cilës e themeloi në Llap.
Sikur ky, jashtë listës figura të saja la edhe Vetëvendosje. Zëvendëskryeministri Besnik Bislimi s’u përfshi pasi është shef i shtabit zgjedhor e s’ishte përfshirë as në të kaluarën, ndërsa ministri Liburn Aliu, siç iu tha Klanit, ka kërkuar vetë që të mos jetë pjesë e zgjedhjeve. /Klankosova.tv
