Një grabitje me armë ndodhi paraditen e së hënës, afër qendrës tregtare “Albi Mall”, në Veternik.
Si pasojë e të shtënave me armë, dy persona kanë mbetur të plagosur.
Çaste më vonë, policia gjeti furgonin e djegur të grabitësve, në Hajvali.
Me të djegur furgonin në Hajvali, të dyshuarit janë distancuar larg Prishtinës me një tjetër veturë.
Burime të IndeksOnline pohojnë se sot gjatë ditës u gjet vetura e cila dyshohet të jetë shfrytëzuar po nga grabitësit e incidentit të së hënës.
Pas hetimeve intensive nga Policia e Kosovës, vetura e tipit “Volkswagen” u gjet në Llapnasellë të Graçanicës, e parkuar pranë një kompleksi banesor.
Në veturë u gjet një armë e llojit AK-47, dy granata dore dhe një uniformë e ushtrisë.
Ndërkohë, të hënën Prokuroria konfirmoi se është arrestuar një person relevant me rastin.
“Hetuesit policorë, në bashkëpunim me Prokurorin e shtetit, kanë ndaluar një person për vepër penale ‘’Grabitja’’ nga neni 317 dhe ‘’Mbajtja në pronësi, kontroll ose posedim të paautorizuar të armëve’’ nga neni 366 të Kodit Penal të Republikës së Kosovës, si dhe Prokuroria Themelore vazhdon ndjekjen e personave të cilët ndodhen në arrati”, njoftoi Prokuroria.
Nga shkëmbimet me armë zjarri, të plagosur të hënën mbeten pjesëtari i sigurimit nga kompania e sigurimit “Istanbul Ozel Guvenlik”, Fahri Ademi, i cili ishte në mbrojtje të furgonit që po transportonte para, si dhe një nga grabitësit, 25-vjeçari nga Leshaku i Leposaviqit, Millosh Vukojeviq./IndeksOnline/
