Arbër Vokrri, zëvendësministër në Ministrinë e Pushtetit Lokal, ka dhënë një intervistë në Klan Kosova, ku ka folur për shumë tema, përfshirë situatën e sigurisë dhe politike në veri të Kosovës. Duke folur për veriun e Kosovës, Vokrri e kritikoi Listën Serbe, partinë më të madhe serbe në Kosovë. Çka tha Vokrri?
Në lidhje me këtë temë, Vokrri, që është aktivist i moçem i VV-së, dha një “lajm që nuk është aq i mirë”.
“Po e jap këtu edhe një, t’i themi, lajm që nuk është aq i mirë. Në kuadër të këtij riaktivizimi të Listës Serbe për shkak se e kanë parë qartë që kanë humbur shumë terren, ata së voni, është fjala për javët e fundit, i kanë bërë dy mijë kontrata të reja për punësim të përhershëm me qytetarët serbë të Veriut, edhe në njëfarë mënyre këtu pra lind njëfarë konkurrence mes Serbisë dhe Kosovës”, deklaroi Vokrri në Info Magazine të Klan Kosovës.
Në analizën e tij, që përfshiu edhe gjepolitikën globale, Vokrri bëri disa interpretime të çuditshme. Në këtë intervistë, Vokrri foli për rrezikun e një konflikti me përmasa botërore. Madje, Vokrri bëri thirrje që kosovarët të jenë koshientë në lidhje me mundësinë e një lufte me “përmasa botërore”.
“Tash ndodhemi në një situatë tjetër, më ndryshe kur kërcënohemi nga një konflikt me përmasa botërore dhe duhet të jemi koshient për këtë.” – deklaroi zv.ministri Vokrri, ndërsa ndërhyri moderatorja e Klan Kosovës, e cila shtroi një pyetje që kërkonte sqarim.
“A naj shpjegon pak, të lutem, zoti Vokrri, çka nënkuptoni me këtë?” – ishte pyetja e moderatores.
E përgjigja e zëvendëministrit Vokrri është absolutisht alarmuese. Nuk është alarmuese për shkak të këmtit, sa për logjikën shantazhuese të Vokrrit përmes të cilës synon ta legjitimojë pranimin e Asociacionit. Lexojeni përgjigjen e tij:
“Si shoqëri duhet t’i masim do gjëra. A jemi të gatshëm të shkojmë edhe në një luftë apo të gjejmë një rrugë që t’i zgjedhim problemet, duke i ruajtur aleancat dhe partneritetet strategjike që janë ndërtuar mes nesh dhe faktorit ndërkombëtar, por natyrisht duke i parë parasysh interesant afatgjata të qytetarëve tanë” – deklaroi ai.
Moderatorja sërish ndërhyri, duke synuar që të sqarojë edhe më tutje deklaratën e Vokrrit.
“Pra mospranimi eventual i propozimit të emisarëve euro-amerikanë për draft-statutin e Asociacionit, të cilin e konsideroi si çështje me urgjencë që duhet të nis zbatimi i tij do të mund të çonte Kosovën drejt një konflikti?” – ishte pyetja e moderatores.
E pyetjes së moderatores, z. Vokrri iu përgjigj me një kundërpyetje.
“Nëse s’ka marrëveshje, çka është alternativa?” – ishte pyetja retorike e Vokrrit, i cili vazhdo se “dhe kjo nuk është që po thuhet prej meje”, duke treguar se të njëjtën gjë e mendon edhe kryeministri Albin Kurti.
“Kur e pati thënë kryeministri herët gjatë këtij viti e mbase edhe më herët, që do të ishte fare e papërgjegjshme që të përjashtojmë në tërësi mundësinë e një konflikti të armatosur” – shtoi Vokrri.
Por çfarë kishte thënë Kurti në deklaratën që po i referohet vartësi i tij, pra zv.ministri Vokrri?
Vitin e kaluar, në një intervistë për Reuters, Kurti kishte përmendur mundësinë e një konflikt të ri.
“Unë nuk po them se do të na sulmojnë këtë javë ose në vijim, por do të ishte krejtësisht e papërgjegjshme të përjashtohej mundësia e rritjes së tensioneve dhe konflikteve të reja”, tha mes tjerash kryeministri./Nacionale
