Marketet në vendin tonë jo rrallëherë janë cak i vjedhjeve e grabitjeve. Në shumicën e raseteve, të dyshuarit veprojnë si grup dhe arrijnë të kapin para të gatshme e gjësende të tjera. Jo rrallëherë ka ndodhur që edhe të miturit të përfshihen në të tilla raste dhe të futen në sherr me pronarët e këtye bizneseve, raporton Gazeta Sinjali.
Një rast i tillë ka ndodhur mbrëmë në fshatin Dobrajë e Madhe në Lipjan, por këtë herë është arrestuar pronari i një marketi, i cili po dyshohet se e sulmoi fizikisht një fëmijë.
Siç mëson Sinjali, viktima që u godit nga i dyshuari është një 14-vjeçar, i cili kishte vjedhur në marketin e 44-vjeçarit dhe i njëjti e kishte kapur në flagrancë.
Por kjo i kushtoi, pasi si rezultat i denoncimit të rastit, pronari i dyshuar është shoqëruar në stacion policor, ku është intervistuar nga hetuesit policorë.
Ndaj tij, Prokurori i Shtetit ka urdhëruar masën e ndalimit policor dhe inicimin e rastit për veprën penale “Lëndim i lehtë trupor”./Gazeta Sinjali
