Nënkryetari i PDK-së, njëherit ish-ministri i Shëndetësisë, Uran Ismaili ka kritikuar presidenten Vjosa Osmani për ndërhyrjen kirurgjike që e kreu në një spital privat e jo në QKUK.
Ismaili përmes një postimi në Facebook, ka shkruar se është për keqardhje mosbesimi i madh që ky koalicion qeverisës po tregon ndaj Institucioneve Publike Shëndetësore.
“Për më tepër, neglizhenca ndaj sektorit të shëndetësisë prej kësaj Qeverie, është edhe më shqetësues. Brenda pak muajve po e presim ministrin e tretë të Shëndetësisë, ndërkaq, po bëhen tashmë një muaj që kur ky sektor është PA ministër”, ka shkruar Ismaili.
Ish-ministri i Shëndetësisë ka thënë se ky sektor nuk ndreqet me konferenca për media e as me vizita në shërbim të PR-it personal, por vetëm me investime konkrete të cilat fatkeqësisht ende nuk po i shohim askund. /Telegrafi/
