Mediat e huaja i kanë bërë jehonë situatës në veri të Kosovës, ku serbët po vazhdojnë me ngritjen e barrikadave.
Ushtria serbe thotë se është në “nivelin e saj më të lartë të gatishmërisë luftarake” pas javësh të përshkallëzimit të tensioneve midis Serbisë dhe Kosovës, nis raportimi i BBC.
Presidenti Aleksandar Vuçiq thotë se do të marrë të gjitha masat për të mbrojtur popullin e tij dhe për të ruajtur Serbinë.
BBC shkruan se kërcënimi është më i fortë se kurrë dhe pason pretendimet e mediave të Prishtinës se Serbia përgatit “një sulm” ndaj zonave etnike serbe në veri të Kosovës.
Ndërkaq The Guardian, shkruan se ushtria serbe është vënë në gjendje gatishmërie të shtuar për tensionet me Kosovën disa herë në vitet e fundit – herën e fundit në nëntor pasi qeveria pretendoi se disa dronë hynë në hapësirën ajrore serbe nga Kosova, transmeton Reporteri.
France 24 shkruan se nuk është e qartë se çfarë do të thotë urdhri që Ushtria e Serbisë dhe Policia të jenë në shkallën më të lartë të gatishmërisë luftarake.
“Nuk ishte menjëherë e qartë se çfarë do të thoshte ky urdhër në terren pasi trupat serbe kanë qenë në gatishmëri për një kohë në kufirin me Kosovën”, shkruan ky medium.
Presidenti i Serbisë, Aleksandar Vuçiq, ka urdhëruar Ushtrinë e Serbisë dhe Policinë që të jenë në shkallën më të lartë të gatishmërisë luftarake.
Në anën tjetër, serbët kanë vazhduar me ngritjen e barrikadave edhe sot. Dy barrikada të reja janë ngritur nga grupet kriminale gjatë natës, një brenda qytetit në Lagjen e Boshnjakëve dhe një në Zveçan. /Reporteri.net
