Ministria e Punëve të Jashtme ka konfirmuar se ka aprovuar kërkesën e drejtorit të së ashtuquajturës Zyrë për Kosovën në Qeverinë e Serbisë, Petar Petkoviq.
MPJ-ja ka konfirmuar për “Zërin” se leja është dhënë nën premisat që të shërbejë ekskluzivisht për kryerjen e riteve fetare dhe si e tillë nuk mund të shërbejë për synime ose aktivitete të tjera.
“Ministria e Punëve të Jashtme dhe Diasporës (MPJD) ka aprovuar kërkesën për lejim të vizitës në Republikën e Kosovës të zyrtarit serb Petar Petkoviq, për datat 6-7 janar 2023. Kërkesa është shqyrtuar konform Marrëveshjes për vizitat zyrtare, e nënshkruar në vitin 2014 në Bruksel. Leja është dhënë nën premisat që të shërbejë ekskluzivisht për kryerjen e riteve fetare dhe si e tillë nuk mund të shërbejë për synime ose aktivitete të tjera”, thuhet në përgjigjen e MPJ-së.
MPJ-ja kujton se Petkoviqi është i obliguar të përmbahet nga deklarimet politike, gjuha nxitëse dhe retorika kundër Republikës së Kosovës.
“Çdo tejkalim i këtyre rregullave do të çojë në ndërprerjen e menjëhershme të vizitës dhe rezervimit të së drejtës për refuzim të kërkesave në të ardhmen”, thuhet në përgjigjen e MPJ-së për “Zërin”.
Më herët mediat serbe kanë raportuar se Petkoviqi do të vijë në Kosovë pas orës 16:00.
Ai sot do të marrë pjesë në ndezjen e pemës së Krishtlindjes në Zubin Potok dhe në mesnatë ai do të jetë në liturgji në manastirin e Banjskës.
Të nesërmen, më 7 janar, në orët e hershme të mëngjesit, Petkoviqi do të vizitojë një familje serbë në Zveçan, ku edhe do të përfundojë vizita e tij. /Zëri
