Kryeministri Albin Kurti tha se në takimin e mbrëmshëm që ka pasë me emisarin e BE-së, Miroslav Lajçak, kanë folur edhe për takimet që ai ka zhvilluar me vendet e BE-së që vazhdojnë të mos e njohin Kosovën.
Kurti tha se ka atmosferë të përmirësuar në mesin e pesë shteteve të BE-së për çështjen e Kosovës, por se s’ka hapa konkretë. Për këtë ai tha se duhet angazhim më i madh.
“Na tregoi neve edhe për takimet që i ka pasë dhe në këto takime ka përmirësim të atmosferës për Kosovën në raport me ajo që është e nevojshme për neve, pra njohja. Mirëpo, s’ka hapa konkretë. Unë besoj që duhet angazhim shumë më i madh që të kemi hapa konkretë. Pese vende të BE-së s’e njohin Kosovën – përmes njohjes së tyre do të na hapnin plotësisht për integrim në NATO dhe BE dhe kjo është tejet e rëndësishme për neve”, tha Kurti para gazetarëve.
Ai shtoi se njohja nga këto pesë shtetet është minimalja e asaj që presin kosovarët në raport me vendet demokratike europiane.
“Natyrisht që po të kishim ne mundësinë për ulëse në OKB gjithçka do të ishte më kollaj, por duke pasë parasysh që në Këshill të Sigurimit të OKB-së e kemi Federatën Ruse dhe Kinën, ajo çka minimumi çka qytetarët e Kosovës e presin është që pesë shtetet demokratike europiane t’i bashkohen shumicës së vendeve anëtare të BE-së dhe ta njohin pavarësinë e Kosovës”./Express/
