Profesori universitar, Blerim Latifi, ka komentuar praninë e fotos së ish-presidentit të Kosovës, Ibrahim Rugova, në murin e Parlamentit Europian. Në pritjen e bërë nga kryetarja e PE-së, Roberta Metsola, ndaj presidentit të Ukrainës, Volodymyr Zelenskiy, shihej në sfond edhe fotoja e Rugovës.
Latifi tregon se në atë mur janë të vendosura fotot e laureatëve të Çmimit “Saharov”, të cilin e kishte fituar Rugova, por e ka fituar edhe një shqiptar tjetër plot 7 vite para tij. Laureat i këtij çmimi ka qenë edhe veprimtari i çështjes kombëtare, Adem Demaçi.
“Të gjithë laureatët e Çmimit “Saharov”, të cilin e jep Parlamenti Europian, i kanë fotografitë e vendosura në një hapësirë që i dedikohet pikërisht këtij çmimi. Derisa në këtë pamje të çastit fotografia e Rugovës qëndron prapa Zelenskit dhe kryetarës së Parlamentit Europian, në murin përballë tyre qëndron fotografia e një shqiptari tjetër të madh, i cili e ka marrë këtë çmim shtatë vjet para Rugovës. Fotografia e Adem Demaçit”, shkroi Latifi. /Gazeta Express/
