Hekuran Murati, ministër i Financave, Punës dhe Transfereve, pasi deklaroi që në platformën qeveritare “Superpuna” ka rroga që shkojnë deri më 1 mijë euro, tani e ka përmendur të njëjtën shifër, por kësaj radhe për numrin e të punësuarve përmes kësaj platforme.
Përmes një postimi në Facebook, të mërkurën, Murati ka deklaruar se janë edhe 1 mijë e 500 pozita të lira pune për të rinjtë nga mosha 15 deri në 25 vjeç.
Ndryshe nga pushteti, opozita pohon që kjo platformë është “super mashtrim”, deputetja e Partisë Demokratike të Kosovës (PDK), Ganimete Musliu, thotë se “të rinjtë janë duke u mashtruar”.
“E kam thënë në fillim të mandatit të kësaj Qeveria që të vetmin projekt që mund ta bëjnë është realizimi i projektit varfëro dhe sundo”, ka thënë Musliu për Gazetën Express.
Sipas deputetes opozitare, ekzekutivi i drejtuar nga Albin Kurti ”po vazhdon të tallet me kategoritë shoqërore”, përmendi edhe Ligjin e Pagave.
“Kjo Qeveri vazhdon edhe me tutje të tallet me qytetaret ashtu siç u tall me Ligjin e Pagave ashtu siç u tall me Fondin e Sigurisë e të Pandemisë, ashtu siç po tallet me shëndetësinë, ashtu siç po tallet me inspektoratin e punës e me shumë tjera”, ka deklaruar ajo.
Ndërkaq, Jusuf Azemi, kryetar i Sindikatës së Pavarur të Sektorit Privat, ka shprehur dyshime që “ka shumë manipulime përmes kësaj platforme”.
Bazuar në atë që thotë Azemi “ka punëtorë që regjistrohen sa për ta marrë atë pagë dhe nuk punojnë asgjë”.
“Nuk ka punëtor që për 250 euro qëndron në punë nga ora 8:00 deri 16:00, por janë përfitues individë të ndryshëm”, ka thënë Azemi teka shton se ka edhe familjarë “të punësuar”.
Beson se i vetmi efekt pozitiv i kësaj politike qeveritare është dalja në qarkullim e mjeteve financiare.
“Sa për avancim e vazhdimësi të kësaj pune pas gjashtë muajve dihet që nuk do të ketë”, shprehet ai për Gazetën Express.
Në shkurt të këtij viti Qeveria e Kosovës e plasoi platformën “Superpuna”, përmes së cilës shteti ofron 250 euro për gjashtë muaj për çdo të ri prej moshës 18 deri në 25 vjeç.
“Punëdhënësit mund të shtojnë”, ka thënë Murati i cili më 27 shkurt ka treguar se paga mesatare nga shpalljet në “Superpuna” është 358 euro.
Në faqen e “Super Punës“ janë të vendosura disa rregulla të cilat njoftojnë se 1. Nuk mund të angazhoni punëtorë që kanë punuar më parë në kompaninë tuaj 2) Nuk mund t’i angazhoni punëtoret aktualë me punëtorët e angazhuar përmes Super Punës 3) Nuk mund të bie numri i punëtoreve të rregullt më poshtë sesa para angazhimit të punëtorëve përmes Superpuna 4) Obligoheni të mbani evidencë mbi vijueshmërinë e punës së punëtorëve të angazhuar përmes Superpunës. 5). Superpuna rezervon të drejtën të suspendojë kompanitë të cilat abuzojnë apo shkelin rregullat e përdorimit 6) Punëdhënësit të cilët angazhojnë punëtorë përmes Superpuna do të jenë subjekt i monitorimit të rregullta.
Por Jusuf Azemi thotë se “këto rregulla nuk gjejnë zbatim”, duke hedhur dyshime mbi efektin e projektit i cili ende nuk i ka mbushur një muaj. /Express
