Shefi i Zyrës së Bashkimit Evropian në Kosovë, Tomas Szunyog, përmes një cicërime në rrjetin e tij social në Twitter, ka njoftuar se është takuar me kryetarin e Lidhjes Demokratike të Kosovës, Lumir Abdixhiku me të cilin ka biseduar për zbatimin e menjëhershëm të marrëveshjes për normalizimin e marrëdhënieve në mes të Kosovës dhe Serbisë.
“Duke iu drejtuar partive opozitare, sot në mëngjes u takova Lumir Abdixhikun dhe lidershipin e LDK-së për të diskutuar nevojën e mbështetjes së tyre për zbatimin e menjëhershëm të Marrëveshjes në rrugën e normalizimit ndërmjet Kosovës dhe Serbisë”, shkroi ai.
Të mërkurën, Szunyog, është takuar edhe me kryetarin e Partisë Demokratike të Kosovës, Memli Krasniqi.
“U takova sot me Memli Krasniqin dhe Abelard Tahirin të PDK-së për të diskutuar mbështetjen e opozitës për zbatimin e menjëhershëm të Marrëveshjes në rrugën e normalizimit ndërmjet Kosovës dhe Serbisë dhe funksionimin efektiv të Kuvendit”.
Ai shtoi se Komisioni Evropian është “në proces të përgatitjes së Raportit për Kosovën për vitin 2023”, dhe potencoi se “ka disa fusha që kërkojnë përparim legjislativ në rrugën evropiane të Kosovës, koha është thelbësore pasi raporti mbulon periudhën deri në 06\2023”./Albanianpost.com
