Shkrimtari i madh shqiptar Ismail Kadare është dekoruar me urdhrin “Hasan Prishtina”. Në një ceremoni të organizuar të mërkurën nga presidentja e Kosovës, Vjosa Osmani, Kadareja është cilësuar si “shembull i vyer për popullin shqiptar”.
“Si mirënjohje në emër të popullit të Kosovës, nderojmë shkrimtarin tonë të shquar, zotin Ismail Kadare vepra e të cilit është enciklopedi artistike e jetës së rëndomtë të shqiptarëve, e historisë së tyre, dokeve e traditave dhe mbi të gjitha e gjuhës shqipe”, ka thënë Osmani teksa i ka ndarë urdhrin Kadaresë.
Ndërkaq, Kadareja ka thënë se e konsideron fat të rrallë që një popull i tërë ta nderojë.
“Jam shumë i prekur që jam në mes të jush, për këtë nderim kaq të madh. Çdo njeri çdo shqiptar do ta ëndërronte gjë të tillë. Është fat i rrallë që një popull të të nderojë”, ka thënë Kadareja pasi është dekoruar.
