Si lajm të mirë e ka cilësuar ministrja e Drejtësisë, Albulena Haxhiu, lirimin e tre policëve kosovarë nga paraburgimi në Serbi.
Përmes një postimi në rrjetin e saj social në Facebook, Haxhiu, ndër të tjera ka shkruar se lirimi i zyrtarëve policorë dëshmon edhe më tej vërtetësinë për skemat e krijuar nga Beogradi me qëllim destabilizimin në Veri të Kosovës.
“Kidnapimi i tre policëve nuk kishte të bënte me drejtësi, por me agresionin e Serbisë në Kosovë”.
Prandaj ajo ka kërkuar që komuniteti ndërkombëtar për këtë rast të kërkojë përgjegjësi nga autoritete serbe për hyrjen e tyre të jashtëligjshme në Kosovë dhe rrëmbimin e tre policëve kufitarë.
Tre policët të kapur nga forcat serbe në territorin e Kosovës, të cilëve iu ishte shqiptuar masa e paraburgimit prej 30 ditësh, këtë të hënë janë liruar me vendim të Gjykatës së Lartë në Kralevë.
Kështu të paktën konfirmuan për Albanian Post zyrtarë të pranishëm brenda sallës ku u morë vendimi në një gjykatore në Kralevë.
Policet kufitarë Rifat Zeka, Beqir Sefi dhe Mustafë Shemi, u arrestuan me 14 qershor, derisa po drekonin në një tavolinë të improvizuar në linjën kufitare me Serbinë.
Siç njoftoi ministrja e Punëve të Jashtme Donika Gërvalla në një konferencë me kryeministrin, Albin Kurti, ata ishin duke ngrënë kur u rrethuan nga 15 pjesëtarë të forcave serbe dhe u dërguan në Serbi.
