Katër raste të dhunës në familje janë raportuar në Policinë e Kosovës gjatë 24 orëve të fundit.
Sipas Policisë, dy raste janë raportuar në Prishtinë, një në Fushë Kosovë dhe një në Ferizaj.
Një grua në Prishtinë ka raportuar se djali i saj në vazhdimësi është duke ushtruar dhunë psikike ndaj saj.
“I dyshuari pas intervistim me vendim të prokurorit është dërguar në mbajtje”- ka njoftuar Policia.
Ndërsa një person është arrestuar për dhunë fizike ndaj bashkëshortes.
Sipas njoftimit, rasti ka ndodhur dje në Prishtinë.
Në Fushë Kosovë një burrë është arrestuar nën dyshimin se në vazhdimësi kishte ushtruar dhunë psikike dhe fizike ndaj bashkëshortes së tij.
“Me vendim të prokurorit i dyshuari është liruar dhe rasti shkon në procedurë të rregullt”- ka njoftuar Policia.
Edhe në Ferizaj një burrë është arrestuar nën dyshimin se ka ushtruar dhunë fizike ndaj një gruaje.
Lidhur me rastin është sekuestruar një pistoletë.
Ndërsa është bërë e ditur se me vendim të prokurorit i dyshuari është dërguar në mbajtje./Kallxo.com
