U mbajt turne në Pingpong
Në kuadër të aktiviteteve të Manifestimit “Ditët e Diasporës”, dje është mbajtur turne në Pingpong. Ky turne është organizuar nga Komuna e Podujevës, gjegjësisht Drejtoria për Kulturë, Rini dhe Sport në bashkëpunim me Federatën e Pingpongut të Kosovës.
Turneu përveç karakterit garues, kishte për qëllim edhe argëtimin e qytetarëve, në veçanti mërgimtarët, të cilët edhe e provuan lojën e pingpongut që u mbajt në Sheshin “Katër Dëshmorët”.
Në turne morën pjesë 30 garues të rinj nga të dy gjinitë, ndërkohë që fituesit e 3 vendeve të para (në të dy gjinitë) u shpërblyen me medalje, të cilat i ndau kryetari i Federatës, Nehat Çitaku.
Garat i udhëhoqi Fadil Luta, sekretar i FPPK-së, i asistuar nga profesorët e Shoqatës së Sportit Shkollor dhe zyrtarit për Sport të DKRS në Podujevë.
Drejtoresha e DKRS-së, Vlora Humolli-Jashanica, i falëndëroi të gjithë pjesëmarrësit e këtij turneu, si dhe Federatën e Pingpongut të Kosovës për realizimin e këtij aktiviteti sportiv. Humolli Jashanica i nderoi me mirënjohje kryetarin e Federatës Nehat Çitaku dhe profesorët Faik Çitaku dhe Abedin Bahtiri.
