Lumir Abdixhiku, kandidati i Lidhjes Demokratike të Kosovës (LDK) për kryeministër, ka mbajtur një takim me qytetarët e fshatit Lluzhan të Komunës së Podujevës, raporton Ekonomia Online.
Gjatë fjalës së tij, ai theksoi se LDK-ja është e gatshme të sjellë ndryshime, duke akuzuar qeverisjen aktuale për dështime në realizimin e projekteve, përfshirë rrugën Prishtinë-Podujevë.
Abdixhiku ftoi qytetarët që të bashkohen dhe të kthehen në “shtëpinë e vjetër të LDK-së”.
“Jo rastësisht që sot e kemi marrë numrin 124 dhe të jetë numri i fitores, data është më 9 shkurt dhe numrin e votave po ua lëmë juve. Për katër vite kanë pasur pushtetin e dyfishtë dhe ka pasur edhe pushtet absolut dhe buxhet, por për katër vite nuk kanë arritur të bëjnë asgjë, as rrugën Prishtine-Podujevë. Në këtë udhëkryq politikë ne përcaktojmë fatin e vet të Republikës se Kosovës. Këtë herë kam thirrje të qartë ngrihuni si çdoherë nga sot e më 9 shkurt të kthehet në shtëpinë e vjetër atë të LDK-së. Është rrugë e historisë së Republikës së Kosovës dhe LDK-së, është rrugë drejtë bashkimit nga përçarja”, tha Abdixhiku.
Ai ka theksuar se në Llap është beteja e parë dhe më e rëndësishme e këtyre zgjedhjeve.
“Hapni dyert shtroni dorën e bashkimit dhe na jepni një fitore të LDK-së, se pa fitoren në Llap e dimë që nuk po e njohim fitoren fare sepse nuk ka lezet. Këtu e kemi betejën e parë dhe të rëndësishme. Të bëjmë sa më shumë projekte dhe sa më pak fjalë sepse kemi nevojë, qeveria jonë do t’iu shërbejmë të gjithëve dhe i ftojmë në këtë rrugëtim të gjatë për këto katër vite te ardhshme. Pa Llap nuk ka LDK, pa LDK nuk ka Llap”, ka thënë Abdixhiku.
Ekrem Hyseni, kryetari i degës së Podujevës theksoi se lista e partisë përfaqëson profesionistë të suksesshëm.
Ai përmendi se LDK-ja ka një program të ri, “Rruga e Re”, që synon përmirësimin e kushteve të qytetarëve dhe ka hapa të guximshëm për ndryshime të shpejta.
“Ne kemi listën më të mirë. Kjo listë përbënë diversitet të profesioneve të cilët në të kaluarën e kanë dëshmuar si profesionit dhe njerëz të mirë dhe nesër do të jenë përfaqësues tuaj. Ne nuk është që jemi sot këtu, se duam një fitore për kryeministre Lumir Abdixhiku ,por sepse vjen me një program për të përmirësuar dhe ndryshuar gjendjen e qytetarit në Kosovë. Gjendja aktuale me rritje çmimesh i përgjigjet LDK-ja me një program që është Rruga e Re e cila janë hapa te guximshëm dhe është një program vizinoar dhe do të ndryshoj gjendjen për mirë dhe shumë shpejtë. Për here të parë kemi marrë një njeri nga diaspora, kandidatni Mustafë Abazin, e kemi Qendrim Sokolin, Arjeta Abazi, Gani Zeqiri, Fatlume Jaha dhe Valon Demolli “, ka thënë ai.
