Drejtori për Arsim, Avni Fetahu ka nënshkruar marrëveshje bashkëpunimi me përfaqësuesen e Shoqatës Profesionale të Informaticentëve të Kosovës (SHPIK), Diellza Shllaku me qëllim të aftësimit të nxënësve të shkollave fillore dhe të mesme në fushën e teknologjisë informative.
Në bazë të kësaj marrëveshjeje, SHPIK do të përkrah Komunën dhe shkollat në implementimin e “Javës së Orës së Kodimit”; Trajnimin e mësimdhënësve të SHFMU dhe SHML në implementimin e aktiviteteve ekstrakurrikulare të kodimit; Ngritjen e klubeve të kodimit në SHFMU dhe SHML në koordinim me Komunën; dhe Ogranizimin e sfidës ndërkombëtare të informatikës Bebras.
Drejtori Avni Fetahu tha se me këtë marrëveshje përveçse do të përfitojnë trajnime mësimdhënësit, për nxënësit është një mundësi shtesë për të mësuar aftësi të reja, të shfrytëzojnë kreativitetin e tyre dhe të krijojnë zgjidhje përmes teknologjisë.
“Për nxënësit kjo është mundësi për të eksploruar, eksperimentuar dhe për të ndërtuar bazat për një të ardhme të ndritur”, theksoi Fetahu.
Ky është viti i dytë që Komuna e Podujevës nënshkruan marrëveshje me Organizatën SHPIK.
15.01.2025, Podujevë
Zyra për Marrëdhënie me Publikun dhe Informim
