Turneu tradicional në futboll të vogël në Kërpimeh përmbyllet me sukses – FC Batllava shpallet kampione
Mbrëmë u përmbyll me sukses turneu tradicional në futboll të vogël në fshatin Kërpimeh, i cili u organizua në nderim të dëshmorëve të kësaj ane. Turneu, që zgjati disa javë, mblodhi shumë adhurues të sportit dhe krijoi një atmosferë të gjallë e bashkuese në mesin e komunitetit lokal.
Finalja e turneut u zhvillua mes ekipeve FC Batllava dhe FC 7 Vëllezërit Sylevica, ku pas një ndeshjeje të fortë dhe korrekte, fituese doli skuadra e Batllavës.
Kryetari i Komunës së Podujevës, Shpejtim Bulliqi, përmes një reagimi publik ka përgëzuar organizatorët për angazhimin dhe punën e shkëlqyer në zhvillimin e këtij turneu. Ai ka theksuar rëndësinë e aktiviteteve të tilla që jo vetëm që promovojnë sportin dhe garën e ndershme, por gjithashtu mbajnë gjallë kujtimin dhe nderimin për dëshmorët që dhanë jetën për lirinë e vendit.
“Përgëzoj organizatorët për angazhimin dhe punën e bërë gjatë këtyre javëve, duke sjellë një turne cilësor që mblodhi shumë dashamirë të futbollit dhe krijoi atmosferë sportive në Kërpimeh. Falënderim dhe përgëzim edhe për të gjitha ekipet pjesëmarrëse për garën korrekte dhe fair play,” – u shpreh kryetari Bulliqi.
Komuna e Podujevës mbetet e përkushtuar në mbështetjen e aktiviteteve sportive dhe komunitare që fuqizojnë shoqërinë dhe nxisin vlera të shëndetshme tek të rinjtë dhe qytetarët e saj.
