Deputeti i Aleancës për Ardhmërinë e Kosovës (AAK), Bekë Berisha, ka shprehur skepticizëm lidhur me efektin e takimit konsultativ të thirrur nga presidentja Vjosa Osmani me liderët e partive politike, përpara mbajtjes së seancës konstituive të Kuvendit.
Në një deklaratë për media para nisjes së seancës, Berisha tha se AAK nuk pret ndonjë rezultat konkret nga ky takim, duke theksuar se veprimet që po ndërmerren janë më shumë formale.
“Në fakt, duhet të konsumohen edhe këto dy veprime: ftesa nga presidentja dhe një pyetje që ia kemi bërë Gjykatës Kushtetuese. Nuk kam ndonjë shpresë që do të zgjidhet diçka te presidentja, sepse partitë politike janë deklaruar para takimit”, u shpreh ai.
Berisha përmendi se partitë kanë marrë qëndrime të qarta përpara këtij takimi, çka sipas tij, lë pak hapësirë për ndonjë kompromis të mundshëm.
