Një ngjarje tragjike ka ndodhur mbrëmjen e djeshme në një poligon në rrugën “Dritan Hoxha” në Prishtinë, ku një femër ka humbur jetën si pasojë e plagosjes me armë zjarri.
Sipas Policisë së Kosovës, rasti është raportuar rreth orës 19:30, ku viktima L.S., 24 vjeçare, është qëlluar me armë zjarri brenda ambientit të poligonit. Ajo është dërguar menjëherë për trajtim mjekësor në Qendrën Klinike Universitare të Kosovës (QKUK), por përkundër përpjekjeve të mjekëve, rreth orës 22:00 është konfirmuar vdekja e saj.
Njësitë policore kanë dalë menjëherë në vendin e ngjarjes dhe kanë nisur hetimet. Si pjesë e hetimeve fillestare, është arrestuar një zyrtar përgjegjës i poligonit, i cili me urdhër të prokurorit është ndaluar për 48 orë.
Rasti është iniciuar me veprat penale “Vetëvrasje” dhe “Shkaktim i rrezikut të përgjithshëm me pasojë vdekjen”. Hetuesit policorë, në bashkëpunim të ngushtë me Prokurorinë, janë duke punuar për zbardhjen e plotë të rrethanave të kësaj ngjarjeje tragjike./IndeksOnline/
