Gjatë ditës së sotme, Qendrat Operative Regjionale 112 kanë regjistruar gjithsej 57 vatra zjarri në nivel vendi.
Sipas të dhënave zyrtare të publikuara nga Agjencia e Menaxhimit Emergjent, 55 prej tyre janë lokalizuar me sukses falë reagimit të shpejtë të Njësive Profesionale të Zjarrfikjes dhe Shpëtimit, ndërsa 2 vatra vijojnë të jenë ende aktive.
Rasti më shqetësues është raportuar në lagjen “Pajtimi” të Komunës së Shtimes, ku zjarri ka marrë përmasa më të mëdha dhe ka paraqitur rrezik të lartë për banorët.
Si pasojë e ekspozimit ndaj tymit, disa qytetarë janë detyruar të marrin trajtim mjekësor.
Autoritetet kompetente kanë bërë apel të fuqishëm ndaj qytetarëve që të shmangin çdo veprim që mund të shkaktojë zjarr dhe të denoncojnë çdo rast të zjarrvënies së qëllimshme pranë organeve ligjzbatuese.
Po ashtu, në rastet emergjente, qytetarët mund të raportojnë përmes numrave të urgjencës: 112, 193 dhe 192.
