Rama për Sveçlën dhe Muratin: Dikush duhet të hyjë në burg për bllokadën në kryeqytet

Kryetari i komunës së Prishtinës, Përparim Rama, ka akuzuar ministrin në detyrë të Punëve të Brendshme, Xhelal Sveçla dhe ministrin në detyrë të Financave, Hekuran Murati. Madje, për këtë të fundit tha se kanë ngritur padi.

Rama në një intervistë për KosovaPress tha se për ndalesat që iu kanë bërë kryeqytetit, dikush duhet të shkojë në burg.

Ndër të tjera, Rama përmendi edhe për bllokimin e projektit të spitalit të kryeqytetit të cilin Ministria e Punëve të Brendshme nuk ia dha komplet projektin.

“Me një kompani gjermane dhe këtu lokale së bashku me kryeqytetin e kemi përfundu projektin. Projekti kishte me kushtu diku rreth 75 milionë dhe kemi pas një udhëtim së bashku me Presidenten Osmani në Katar ku edhe me Emirin e Katarit atje kemi diskutuar për mundësinë e donacioneve të tyre për të na ndihmuar ne në sfera të ndryshe dhe kërkesa ime ka qenë për spitalin e kryeqytetit. Ekipet e Emirit kanë qenë këtu të gatshme për të bërë investimin, për të na ndihmuar me këtë projekt sepse ja u kemi treguar projektin të shtypur. Momentin kur e kanë kërkuar të gjithë projektin dhe ne e kemi kërkuar nga Ministria e Punëve të Brendshme, nuk na e kanë dhënë projektin. Do të thotë Ministri i punëve të brendshme e ka bllokuar, nuk na e ka dhënë projektin me të cilin ne do të kishim marrë të gjithë ato fonde për ta ndërtuar spitalin. Ministri Sveçla e bllokon, do të thotë nuk na e jep projektin. Projektin i cili është paguar prej taksapaguesve tanë, ne qytetarët e kemi paguar atë projekt e ata e bllokojnë. E bllokojnë dhe humbin një mundësi për një donacion 70-75 milionë euro. Prapë po them, bllokada politike. Për atë kam filluar të mendoj se nuk janë normalë këta njerëz që bëjnë kësi bllokada për çështje politike”.

Kur u pyet se si po ballafaqohet me këto bllokada, Rama tha se ka metoda alternative të financimit që burojnë nga investimet private apo nga asambleja komunale, por theksoi se nuk do të lejojë që këto bllokada të jashtëligjshme të vazhdojnë, e për këtë arsye ai ka dorëzuar edhe padi ndaj ministrit në detyrë të financave, Hekuran Murati

“Ne kemi edhe metoda tjera që janë në përgjithësi të kryeqytetit që kemi me i shty përpara. Tash kemi filluar me padi, me gjyq, me gjykatë sepse këto bllokada, këto ndalesa janë të jashtëligjshme. Pra dikush prej tyre do të hyjë në burg si rezultat i këtyre bllokadave dhe normal që këto gjëra të jashtëligjshme duhet t’i luftojë dikush, e ne jemi duke i luftuar tash. Ne kemi paditur edhe ministrin e financave për bllokim të buxhetit. E në momentin kur dikush hyn në burg aty e sheh se si hapen të gjitha mundësitë sepse çka janë duke bërë, janë duke vepruar jashtëligjshëm e ne këtë nuk do ta lejojmë”.