Ish komandanti i Ushtrisë Çlirimtare të Kosovës, Shukri Buja, i kishte shkruar letër bashkëshortes nga burgu, ku mbahej nga regjimi serb.
Gazetari Arsim Lani e lexoi në Frontal një letër që Buja, tash kandidat për kryetar të Lipjanit, ia uronte 8 marsin gruas së tij. Aty i shkruante për lirinë, për sfidat e okuptimit dhe jetën që do të vinte pas çlirimit.
“Mund të të duket e pabesueshme dhe i paarsyeshëm një urim sot, në një situatë kaq të vështirë. Por nuk do të heq dorë nga gëzimet e jetës, edhe nëse jetën e kemi skëterrë. Nuk do të heqim dorë nga festat – do t’i festojmë. Jemi mbushur me hidhërime nga pushtuesi, e ne duhet vetëm të krijojmë gaz e ta largojmë hidhërimin”, thuhej në një pjesë të letrës, leximi i së cilës sot e emocionoi Bujën.
“Realisht ne ishim përgatitur për rrugëtim të gjatë dhe e dinim me cilin pushtues kemi të bëjmë”, tha Buja.
“Kishim kohë që ishim përgatitur. E kemi pritë edhe arrestimin, edhe burgosjen. Madje kemi pritur që mund ta pësojmë edhe me jetë në burg”.
