Para mbështetësve të LDK-së në Hajvali të Prishtinës, kandidati për kryeministër, Lumir Abdixhiku, theksoi angazhimin e partisë për një të ardhme më të mirë për qytetarët e kryeqytetit dhe për gjithë Kosovën.
Abdixhiku ka theksuar se Prishtina, si zemra e vendit, ka nevojë për një transformim të thellë, kështu duke u zotuar për rreth 1.5 miliard euro investime në kryeqytet.
Më tej pretendenti për kryeministër ka shtuar se fushata e LDK-së është më shumë se një thirrje për vota, duke u shndërruar në një lëvizje të plotë shoqërore që mbështet ndryshimin dhe unitetin, kundër polarizimit dhe përçarjes.
“Hajvali, Prishtinë, Dega 5! Dridhje elektorale edhe e Gollakut!
Asnjë alternativë nuk ofron sot – as për së afërmi – çfarë LDK ofron për Kryeqytet! Prandaj, prishtinasit, ndryshimin e katër viteve më parë po e kërkon dhe në nivel nacional. LDK dhe Prishtina më 9 shkurt bëhen një. Ky momentum i mirë i yni na jep besim dhe shpresë. Na jep vullnet të vazhdojmë kështu çdo ditë. Sepse fushata jonë elektorale tashmë është bërë festë; është bërë antidot i urrejtjes, ndarjes e përçarjes!
Me 1.5 miliard euro investime për Prishtinën, me transformimin rrënjësor me Unazën e Kryeqytetit; Stadiumin e Ri e Qendrën e Sportit, me Parkun Teknologjik e Spitalin e Ri, me mësim tërëditor për 28 mijë fëmijë në Kosovë – Prishtina, banorët e Kryeqytetit më 9 shkurt e fitojnë shtetin që i bllokonte për 4 vjet rresht!
1.5 miliard euro për Prishtinën! Ky është zotimi ynë!
Izet e Fiknete, dy kandidatë të kësaj dege, ju priftë e mbara e ju faleminderit për gjithë organizimin madhështorë sonte!”, ka shkruar Abdixhiku në Facebook.
