Ministri i Mbrojtjes, Armend Mehaj, të martën ka ndarë medalje dhe mirënjohje për ushtarakët dhe zyrtarët më të dalluar të Forcës së Sigurisë së Kosovës (FSK) dhe Ministrisë së Mbrojtjes gjatë vitit 2022.
Në një postim në rrjetin social Facebook, Mehaj ka njoftuar se me medalje “Shërbim i Shquar”, ka dekoruar nënkolonelin Fadil Sahiti, majorin Remzi Bushi, majorin Fatmir Lami, majoren Manushaqe Nura, kapitenin Arlind Bajrami, kapitenen Gëzim Avdiu, togerin Nuhi Pronaj, rreshter-majorin Faton Bujupi, rreshter-masterin, Faik Kurtishi, rreshterin e klasit të parë, Astrit Bashota, rreshterin shtabor Blerim Teraku, rreshterin shtabor, Naim Berisha, rreshterin shtabor Nazif Latifi, rreshteren Marigona Haxhiu, rreshterin Arjan Zogaj, dhe ushtaren e klasit të parë, Entrita Brahimi.
Sipas Mehajt ata janë dalluar për shërbim të shquar dhe të merituar në detyra me përgjegjësi të lartë.
Ministri ka njoftuar se ka ndarë edhe 6 mirënjohje. “Me ‘Mirënjohje’ për kontributin e dalluar të dhënë në realizimin e detyrave dhe përgjegjësive, dekorova: zëvendësshefin e Kabinetit të Sekretarit të Përgjithshëm, Burim Abazi, zyrtarin për plane dhe analiza buxhetore, Bashkim Asllani, shefin e sektorit për plane dhe analiza logjistike, Enver Mehmeti, ligjëruesin në Qendrën për Studime Universitare, Durim Abdullahu, zyrtaren ligjore në Shtabin e Përgjithshëm të FSK-së, Albana Çeku dhe zyrtarin e administratës në këtë Shtab, Luan Trepça”, ka shkruar Mehaj, i cili ka uruar të dekoruarit.
