Kreu i Departamentit të Hetimeve Penale të Policisë Serbe, Marko Kriçak, është arrestuar nën dyshimin për keqpërdorim të detyrës dhe manipulim të provave gjatë hetimit për një vrasje në Beograd.
Së bashku me të është arrestuar edhe Bosko Sekuloviç, drejtor i Shërbimit për Shtypjen e Krimit në Drejtorinë e Hetimeve Penale.
Sipas Prokurorisë, dy zyrtarët dyshohet se kanë shkelur detyrat zyrtare dhe kanë shkaktuar dëme, si dhe kanë cenuar rëndë të drejtat e ish-shefit të Policisë së Beogradit, Veselin Miliç.
Rasti lidhet me hetimet për vrasjen e një burri në muajin maj, i cili ishte paraqitur si anëtar i mafias vendase në një restorant në Beograd.
Miliç ishte arrestuar tri ditë pas vrasjes, nën dyshimin se nuk kishte raportuar krimin dhe autorin e tij, si dhe se kishte strehuar një person të përfshirë në vepër penale.
Pas gati dy muajsh në paraburgim, ai kishte ngritur padi ndaj Kriçakut dhe Sekuloviçit, duke i akuzuar se i kishin dorëzuar Prokurorisë prova selektive, të paplota dhe të rreme kundër tij.
Arrestimi i Kriçakut vjen pasi ai ishte kritikuar edhe nga lëvizja studentore në Serbi, e cila e kishte akuzuar për brutalitet gjatë shtypjes së protestave kundër qeverisë së Aleksandar Vuçiçit.
Ndërkohë, kryeprokurori i Beogradit, Nenad Stefanović, ka deklaruar se arrestimi nuk ka lidhje me rezultatin e zgjedhjeve parlamentare.
Kriçak, 42-vjeçar, ishte ngritur në hierarkinë policore serbe dhe mediat vendase ia kishin atribuar këtë avancim besnikërisë së tij ndaj Vuçiçit.
