Banorët e tri Fshatrave të Podujevës nesër në Protestë për linjat e transportit
Podujevë, 20 janar 2025 – Banorët e fshatrave Halabak, Tërrnavë dhe Bollopojë kanë njoftuar një protestë simbolike dhe vendimtare, duke kërkuar rikthimin e linjave të autobusëve që lidhin këto fshatra me qytetet e Podujevës dhe Prishtinës. Protesta do të mbahet nesër, më 21 janar 2025, në orën 11:00, në magjistralen Podujevë-Prishtinë, pranë rrethit të Shakovicës.
Banorët kanë shprehur zemërimin e tyre ndaj vendimit të Shoqatës së Transportit “Podujevë-Prishtinë,” që, sipas tyre, ka lënë qindra qytetarë pa shërbimin bazë të transportit publik. Ky veprim, që përshkruhet si një padrejtësi e rëndë, ka izoluar fshatrat dhe ka vështirësuar jetesën e përditshme të banorëve.
Pavarësisht protestave dhe kërkesave të vazhdueshme drejtuar institucioneve lokale dhe qendrore, deri më tani nuk ka pasur një reagim zyrtar për zgjidhjen e situatës. Banorët kërkojnë ndërhyrjen urgjente të Komunës së Podujevës, Komunës së Prishtinës dhe Ministrisë së Infrastrukturës për të garantuar të drejtën e tyre për transport publik të rregullt dhe të barabartë.
“Kjo protestë është një thirrje për drejtësi dhe dinjitet,” thanë organizatorët, duke shtuar se nuk do të ndalen deri në realizimin e kërkesave të tyre legjitime.
Data: Nesër (21/01/2025)
Koha: 11:00
Vendi: Magjistralja Podujevë-Prishtinë (Te rrethi i Shakovicës)
