Ministrja e Kulturës dhe e Turizmit, Saranda Bogujevci, ka bërë të ditur se manifestimi letrar, kulturor e shkencor “Takimet e Dom Mikelit” është mbajtur edhe këtë vit në Stubëll.
Bogujevci ka thënë se manifestimi i këtij viti iu kushtua 180-vjetorit të internimit të shqiptarëve të Malësisë së Shkupit në Turqi, duke rikthyer në vëmendje historinë e banorëve të Stubllës, Binçës, Terziajve dhe Vërnakollës.
Aktiviteti u zhvillua në Shkollën e Parë Shqipe, e cila sot funksionon si muze, ku u mblodhën studiues, artistë, dashamirë të kulturës dhe banorë të Stubllës për të kujtuar këtë pjesë të historisë.
“Është kënaqësi të jesh pjesë e një manifestimi që, përmes kulturës dhe dijes, vazhdon të ruajë kujtesën tonë”, ka shkruar Bogujevci.
Ajo ka uruar organizatorët për edicionin e radhës të “Takimeve të Dom Mikelit”.
