Si pasojë e konfliktit me armë zjarri në Klinë, dyshohet për dy të vrarë. Rreth orës 17:15 policia është njoftuar për të shtëna me armë zjarri në sheshin “Mujë Krasniqi” në një lokal.
Demokracia.com ka mësuar nga burimet e veta se dy viktimat në Klinë janë djem të axhës.
Pak minuta më parë Demokracia.com ka mësuar se dorasi dyshohet të jetë një 22 vjeçar, djali i Besim Hotit, i cili ka qenë kryetar i LDK-së në Klinë.
Dorasi siç ka mësuar Demokracia, quhet Adrian Hoti.
Ndërsa, po ashtu siç ka mësuar Demokracia dy viktimat kanë mbiemrin Shlivova dhe janë nga fshati prej nga vjen edhe dorasi, Jashanicë e Klinës.
Deri më tani zëdhënësi i Policisë për Rajonin e Pejës, Fadil Gashi, ka konfirmuar lajmin dhe ka dhënë më shumë detaje rreth incidentit.
Sipas tij, policia u njoftua rreth orës 17:15 për një gjuajtje me armë zjarri në sheshin “Mujë Krasniqi”, brenda një lokale të qytetit.
“Gjatë operacionit, mjeku kujdestar ka konstatuar se një person është pa shenja jete, ndërsa një tjetër është dërguar menjëherë në emergjencë për trajtim të mëtejshëm,” tha Gashi.
Në vendin e ngjarjes kanë mbërritur menjëherë organet kompetente, përfshirë policinë dhe ekipet e emergjencës mjekësore.
Ai theksoi se momentalisht organet kompetente të drejtësisë janë duke kryer hetime për të përcaktuar shkakun e saktë të incidentit tragjik.
Ndërkaq, raportohet se dorasi është vetdorëzuar në stacionin policor në Klinë.
