Gazeta Sinjali ka siguruar detaje të reja nga grabitja spektakolare që ndodhi mëngjesin e së premtes në autostradën “Ibrahim Rugova”, në afërsi të daljes për fshatin Duhël, ku shënjestër e sulmit u bë furgoni i postës private “Flex” që transportonte para nga Prizreni për në Obiliq.
Sipas të dhënave nga hetimet fillestare, rreth orës 07:40, Artan Buza rreth 44-vjeçar, menaxher i degës së “Flex”-it në Prizren, ishte nisur me automjetin VW Crafter Kombi, duke transportuar dërgesa postare me përmbajtje monetare. Pak minuta pasi kishte kaluar segmentin e Bllacës, në drejtim të Malishevës, ai është ndjekur nga një veturë e zezë tip VW Golf IV, pa targa, në të cilën gjendeshin tre persona të maskuar dhe të armatosur.
Në një moment, vetura e dyshuar është afruar pranë furgonit të postës dhe njëri nga personat brenda saj ka hapur zjarr me armë zjarri, duke goditur katër herë automjetin e “Flex”-it. Nën breshërinë e plumbave, Buza është detyruar ta ndalojë furgonin në anë të rrugës.
Në atë çast, dy nga grabitësit kanë dalë nga vetura, kanë kërcënuar me armë shoferin dhe i kanë marrë zarfe të vulosura me para, që sipas menaxherit përmbanin 10 mijë e 150 euro. Pas grabitjes, autorët janë larguar me shpejtësi në drejtim të Prishtinës.
Njësitë e Krim-Teknikës dhe Hetimeve Rajonale të Prizrenit kanë dalë menjëherë në vendngjarje, ku është bërë ekspertizë e detajuar. Nga ekzaminimi është konstatuar se furgoni është qëlluar me katër plumba, ndërsa në vendin e ngjarjes nuk janë gjetur gëzhoja, çka ngre dyshime se grabitësit kanë përdorur pajisje për mbledhjen e gëzhojave ose kanë vepruar me kujdes të lartë kriminal. Brenda furgonit janë gjetur dy predha, të cilat janë sekuestruar për analiza balistike.
Hetuesit dyshojnë se grabitja është planifikuar me kujdes, pasi rruga në atë segment nuk ka kamera sigurie dhe koha e zgjedhur për sulmin (rreth orës 07:40) përkon me periudhën kur qarkullimi është minimal.
Burime të Sinjalit bëjnë të ditur se po verifikohen të gjitha automjetet e tipit Golf të zi pa targa që mund të jenë parë në lëvizje në drejtim të Prishtinës gjatë orëve të mëngjesit.
Policia është në kërkim aktiv të tre personave të armatosur, ndërsa pista kryesore e hetimit mbetet grabitja e organizuar me motive financiare, e cila sipas burimeve përfshin elementë profesionalë të planifikimit dhe ekzekutimit.
Hetimet po vazhdojnë nën drejtimin e Prokurorisë Themelore në Prizren, ndërsa ekipet e hetuesve rajonalë janë ende në terren.
