Një ngjarje tragjike ka tronditur mbrëmjen e djeshme Gjakovën, ku një grua ka humbur jetën pasi ka rënë nga ballkoni i banesës së saj, raporton Gazeta Sinjali.
Sipas burimeve të besueshme nga Prokuroria Themelore në Gjakovë, rasti ka ndodhur rreth orës 22:20 në rrugën “Ali Pashë Tepelena”, ku një qytetar kishte raportuar se kishte parë një person duke rënë nga ballkoni i katit të gjashtë në terasën e katit të parë.
Në vendngjarje kanë dalë menjëherë njësitë policore, ekipi mjekësor dhe hetuesit rajonalë, të cilët kanë konstatuar se viktima është Marigona Beqa-Zeka, rreth 34-vjeçare.
Ajo është dërguar me urgjencë në spital, por pavarësisht përpjekjeve të mjekëve, nuk ka arritur të mbijetojë.
Me urdhër të Prokurorit të Krimeve të Rënda, rasti është inicuar si “Hetim i vdekjes”, ndërsa trupi i pajetë është dërguar në Institutin e Mjekësisë Ligjore në Prishtinë për obduksion.
Hetimet janë në zhvillim për të zbardhur rrethanat e plota të ngjarjes dhe për të përcaktuar nëse bëhet fjalë për aksident, vetëvrasje apo ndonjë veprim të dyshimtë.
