Ekrem Hyseni, kryetari i LDK-së në Podujevë, mbajti një ligjëratë sensibilizuese për ndërgjegjësimin dhe mbrojtjen ndaj kancerit të gjirit, e organizuar nga Forumi i Gruas i LDK-së në Podujevë.
Duke theksuar rëndësinë e Tetorit si Muaji Ndërkombëtar i Luftës Kundër Kancerit të Gjirit, Hyseni vuri në pah nevojën që kjo betejë të vazhdojë çdo ditë. Ai nënvizoi se kjo sëmundje e rrezikshme mund të luftohet vetëm përmes zbulimit të hershëm, duke bërë thirrje që të rritet kujdesi dhe vetëdijësimi.
“Kam qenë, jam dhe do të jem gjithmonë i gatshëm të jap kontributin maksimal në këtë drejtim. Betejat e tilla të vështira mund të fitohen vetëm të bashkuar,” deklaroi Hyseni.
Në përfundim, ai ritheksoi rëndësinë e kontrolleve të shpeshta dhe kujdesit të shtuar, duke theksuar se zbulimi i hershëm shpëton jetë dhe është kyç në betejën kundër kancerit të gjirit.
Postimi i plote:
Isha i nderuar që sonte mbajta ligjëratë senzibilizuese për ndërgjegjësimin ndaj rreziqeve dhe formave më të mira të mbrojtjes nga kanceri i gjirit, e cila u organizua nga Forumi i Gruas i LDK-së në Podujevë.
Muaji Tetor, është Muaji Ndërkombëtar i Luftës Kundër Kancerit të Gjirit, por ne këtë luftë duhet ta bëjmë çdo ditë e në secilin muaj.
Duke qenë përballë një lufte të tillë çdo ditë, jam i bindur se kjo betejë fitohet vetëm me zbulimin e hershëm.
Prandaj, edhe sonte sikur përherë bëra thirrje që të shtohet kujdesi e të ngritet edhe më shumë vetëdijësimi, në mënyrë që të shtohen edhe kontrollat, sepse vetëm kështu mund të arrijmë sukses në betejën tonë.
Kam qenë, jam dhe do jem përherë i gatshëm që të jap kontributin maksimal në këtë drejtim.
Betejat e tilla të vështira, mund t’i fitojmë vetëm të bashkuar!
Kujdesi i shtuar e zbulimi i hershëm shpëtojnë jetë!
