Ambasadori i Gjermanisë në Prishtinë, Jorn Rohde, derisa ka përkujtuar sakrificën e rreshterit të Policisë së Kosovës, Afrim Bunjaku, në njëvjetorin e rënies herorike, ka kujtuar se autori i sulmit, Millan Radoiçiç, vazhdon të jetë i lirë në Serbi.
“Sakrifica e Bunjakut nuk do të harrohet. Por, autori mbetet i lirë në Serbi pavarësisht se e pranon fajin. Kjo mungesë përgjegjësie dëmton paqen. Drejtësia duhet të vendoset – pa vonesa apo justifikime”, ka shkruar ambasadori gjerman në platformën “X” të martën në mëngjes në njëvjetorin e sulmit terrorist dhe paramilitar në Kosovë.
Qeveria e Kosovës do të organizojë aktivitete për shënimin e njëvjetorit të rënies së rreshterit policor, i cili është vrarë nga paramilitarë serbë në fshatin Banjskë të Zveçanit – komunë e banuar me shumicë serbe – në pjesën veriore të Kosovës.
Nën patronatin e kryeministrit të Kosovës, Albin Kurti aktivitetet do të nisin në orën 09:00 me një vizitë në familjen Bunjaku. Pastaj do të organizohen homazhe te varri i heroit në fshatin Samadrexhë të Vushtrrisë. Pjesa kryesore do të mbahet në orën 15:00, kur do të zhvillohet një akademi përkujtimore në “Pallatin e Rinisë” në Prishtinë.
Rreshteri Bunjaku, tashmë i dekoruar me urdhrin më të lartë ‘Hero i Kosovës’ nga presidentja e vendit, u vra në orët e para të mëngjesit të 24 shtatorit në hyrje të fshatit Banjskë që banohet kryesisht me serbë etnikë nga një grup i organizuar terrorist.
Prokuroria Speciale e Kosovës ka ngritur aktakuzë ndaj 45 personave për inkursionin paramilitar në Banjskë, duke i ngarkuar shumicën e pjesëmarrësve për kryerje të terrorizmit dhe veprave të rënda kundër rendit kushtetues dhe sigurisë së Kosovës./Albanian Post
