Dallaveret në testet teorike dhe praktike për marrjen e patentë shoferit janë shumë të shpeshta në vendin tonë. Kandidatët të cilët nuk arrijnë që të aftësohen mjaftueshëm gjatë orëve të teorisë dhe praktikës nëpër autoshkolla, tentojnë që testet t’i kryejnë përmes rrugëve të kundërligjshme, raporton Gazeta Sinjali.
Kështu kishte vendosur të veprojë edhe një person në Gjilan i cili me ndihmën e instruktorit të autoshkollës, dyshohet se ka tentuar që të ‘vjedh’ rezultatin e mirë në test.
Sinjali mëson se bëhet fjalë për instruktorin, Naim Haxhiu, i cili është arrestuar dhe është shoqëruar në stacion policor.
Por si u zbulua rasti?
Burimet e Gazetës Sinjali brenda Prokurorisë kanë bërë me dije se ka qenë ekzamineri në Qendrën e Aftësimit për patentë shofer, ai i cili ka vërejtur se njëri nga kandidatët që i janë nënshtruar testimit gjatë ditës së djeshme, po bën hile.
Pas intervenimit të Policisë, kandidatit 21-vjeçar iu gjetën në trup disa pajisje elektronike të cilat shërbejnë për kryerjen e testit.
Gjatë dëshmisë së tij, 21-vjeçari ka bërë me dije se kush ia ka vendosur pajisjet, të cilat janë sekuestruar në cilësinë e provave materiale.
Pas kësaj ngjarjeje në stacion policor është intervistuar në cilësinë e të dyshuarit instruktori Haxhiu, i cili me vendim të prokurorit është dërguar në mbajtje për 48 orë.
I njëjti do të hetohet nën dyshimet për kryerjen e veprës penale ‘Keqpërdorim i detyrës zyrtare’.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
