U mbajt debati publik për planin e veprimit për integrimin e Komuniteteve Rom, Ashkali dhe Egjiptian 2023-2026 në Komunën e Podujevës
Sot gjatë ditës në sallen e kuvendit komunal është mbajtur debati publik për planin e veprimit për integrimin e Komuniteteve Rom, Ashkali dhe Egjiptian, 2023-2026 në Komunën e Podujevës. Pjesmarrës në këtë debat publik ishin Drejtori i Drejtorisë së Arsimit, Avni Fetahu së bashku me Udhëheqësin e Zyrës Për Komunitete dhe Kthim, Liman Zeqiri.
Në këtë dëgjim publik është diskutuar për gjendjen aktuale të komuniteteve Rom, Ashkali dhe Egjiptian në Komunën e Podujevës, në arsim, shëndetësi, vendbanim dhe punësim.
Drejtori i DKA-së, Avni Fetahu foli për gjendjen e përgjithshme dhe përfshirjen e komuniteteve pakicë në shkollim, në dy nivelet si në atë fillor po ashtu edhe në atë të mesëm. Me theks të vecçantë foli për mësimin shtesë, ku në bashkëpunim me organizata të ndryshme që merren me çështje të pakicave kanë siguruar mësim shtesë për nxënësit që kanë ngecur në mësime. Ai i inkurajoi pjesëmarrësit dhe qytetarët të kontribuojnë me ide e projekte që ndihmojnë në integrimin e plotë të komuniteteve pakicë në secilën sferë të jetës shoqërore deri më 19 qershor në adresat adekuate për ta plotësuar këtë plan veprimi.
Ndërsa Udhëheqësi ZKK-së, Zeqiri e cilësoi si të mirë gjendjen e komuniteteve në Komunën e Podujevës në përgjithësi, e në veçanti në fushën e arsimit ku tregoi se nga këto komunitete në të gjitha shkollat në Podujevë janë 195 nxënës dhe janë mirë të integruar në shkollim.
Ftohen qytetarët dhe veçanarisht pjesëtarët e komuniteteve të adresojnë sygjerimet dhe vërejtjet e tyre në email adresën liman.zeqiri@rks-gov.net ose në formë të shkruar në Zyrën për Marrëdhënie me Publikun dhe Informim në objektin e Komunës, në afat deri më 19 qershor për planin e veprimit për integrimin e komuniteteve Rom, Ashkali dhe Egjiptian.
30.05.2023, Podujevë
Zyra për Marrëdhënie me Publikun dhe Informim
