Kryetari i Partisë Demokratike të Kosovës (PDK), Memli Krasniqi, ka thënë se para se të takohej me kryeministrin Albin Kurti, është takuar me liderët e partive tjera opozitare, përkatësisht Lumir Abdixhikun e Lidhjes Demokratike të Kosovës dhe Ramush Haradinajn e Aleancës për Ardhmërinë e Kosovës.
Këto komente, Krasniqi i ka bërë në një intervistë për televizionin “Dukagjini”, pasi që ka folur për takimin e të hënës me Kurtin – i vetmi nga liderët e opozitës që e pranoi ftesën e kryeministrit.
“Nuk e kam takuar Albin Kurtin të parin. I kam takuar kolegët e opozitës para tij. Secilin. U kam kërkuar që të bëhemi bashkë si iniciativë opozitare fillimisht që të kërkojmë shkuarjen drejt zgjedhjeve të parakohshme”, tha Krasniqi.
Përveç kësaj, kreu i PDK-së ka theksuar se ka ndërmarrë edhe hapa konkretë për shkuarjen në zgjedhje të parakohshme.
“E kam kandiduar, unë konsideroj njeriun më të duhur në Kosovë për fazën e ardhshme, dhe për adresimin e sfidave, Bedri Hamza. E kam propozuar edhe datën e zgjedhjeve. Kam besuar se ka qenë data më e mirë 9 qershori, që do të koiçidonte me zgjedhjet në Bashkimin Evropian…”, deklaroi.
Kërkesa e Krasniqit, siç tregon ai, “as nuk është për herë të parë, as nuk është vetëm me këtë njeri, është me secilin lider politikë”.
“Dhe unë nuk dëshiroj që të besoj që mundësinë që e kemi për të shkurtuar mandatin e kësaj qeverie do ta humbim, sepse nëse e kemi një pajtueshmëri të përgjithshme”.
