Sot, Kryetari i Komunës së Podujevës, Shpejtim Bulliqi, së bashku me Drejtoreshën e Shëndetësisë, Adelina Stublla, vizituan Urgjencën e re, e cila tashmë është zyrtarisht e hapur dhe në shërbim të qytetarëve të komunës.
Gjatë vizitës, Kryetari dhe Drejtoresha patën mundësinë të takojnë stafin shëndetësor, të cilëve u shprehën urimet më të mira për sukses dhe punë të mbarë në ambientet moderne të objektit të ri.
“Urgjenca e re ofron kushte moderne dhe të favorshme, duke siguruar hapësira të përshtatshme jo vetëm për stafin, por edhe për pacientët. Ky investim është një hap i rëndësishëm për përmirësimin e shërbimeve shëndetësore në komunën tonë,” theksoi Kryetari Bulliqi.
Ky objekt i ri synon të përmirësojë cilësinë e shërbimeve dhe të lehtësojë aksesin e qytetarëve në ndihmën e parë mjekësore, duke kontribuar kështu në një kujdes shëndetësor më të mirë dhe më efikas.
Urime për stafin shëndetësor dhe qytetarët e Podujevës për këtë arritje të rëndësishme!
