Në kuadër të aktiviteteve të ndërgjegjësimit për kancerin e gjirit që po shënohen në mbarë vendin, sot Kryetarja e GVV-së në Podujeve, Adelina Stublla, së bashku me aktiviste të Lëvizjes, vizituan repartin e radiologjisë në Qendrën Kryesore të Mjekësisë Familjare (QKMF) në Podujevë, ku kryhen kontrollet e mamografisë.
Gjatë kësaj vizite, ato u informuan nga drejtori i QKMF-së, Bajram Bajgora, dhe stafi shëndetësor i repartit të radiologjisë për punën dhe përkushtimin e tyre në ofrimin e shërbimeve për pacientët. Deri më tani, nga data 1 tetor deri më sot, janë kryer gjithsej 90 kontrolle të mamografisë në këtë repart.
Adelina Stublla, e cila është njëherësh edhe drejtoreshë e Shëndetësisë në Komunën e Podujevës, apeloi tek gratë, veçanërisht ato mbi moshën 40 vjeçare, që të kryejnë kontrollet e mamografisë sa më shpejt. Ajo theksoi se diagnostifikimi i hershëm është vendimtar për të shpëtuar jetë.
Ky aktivitet është pjesë e fushatës së gjerë të ndërgjegjësimit që zhvillohet në muajin tetor, i njohur globalisht si Muaji i Ndërgjegjësimit për Kancerin e Gjirit./Tv Llapi
