Kryeministri i Kosovës, Albin Kurti, ka kërkuar falje për gabimin matematikor në një ekuacion të klasës së shtatë.
Kërkimfalje nxënësve të klasës 7/1 të shkollës fillore “Ali Hadri”
Të dashur nxënës,
Ju falemnderit për mikpritjen e përzemërt në ndërtesën e re të shkollës suaj. Gëzimi juaj sot më mbushi me mall për bankat shkollore. Por, më duhet të them që tash jam i gëzuar që nuk isha nxënës në atë çast, sepse nuk do të merrja notë kaluese. Ekuacioni i thjeshtë matematikor m’u duk që në sekondën e parë që e ka zgjidhjen x=5; pra pesë, porsi pesëshet që ua dëshiroj juve. Po të mendoja pak, do ta shihja që zgjidhja e saktë është x=0, por në atë rast, nuk besoj që do të merrja mundin të merrja shkumësin e të shkruaja në dërrasën e klasës suaj. Ju kërkoj falje. Zgjidhja e atij ekuacioni, ashtu qysh ju e dini më mirë se kryeministri i juaj, është x=0.
Kurti, gjatë përurimit të një shkolle në Komunën e Podujevës, të mërkurën, në tentim për të impresionuar filloristët, i përvjeli mëngët, për të zgjidhur një ekuacion të thjeshtë matematikorë.
Por, megjithatë i diplomuar në Fakultetin e Elektroteknikës në Universitetin e Prishtinës, drejtimi i Telekomunikacionit me Kompjuterikë, dështoi në zgjidhjen e një ekuacion linear i cili mësohet në klasën e 7-të.
Në një panel diskutimi, Kurti kishte deklaruar se ai e kishte përzemër lëndën e matematikës saqë “kishte vrapuar pas profesorëve më të mirë” të kësaj lënde mësimore gjatë studimeve universitare.
“Profesorët më të mirë të matematikës nuk kanë qenë në FSHMN, por kanë qenë në Fakultetin e Elektroteknikës. Edhe Ejup Hamiti edhe Hajdar Peci, e unë kam vrapuar pas profesorëve më të mirë, ku shkonin ata shkoja edhe unë”, thoshte Kurti.
Zgjidhja e saktë e ekuacionit linear sipas matematicientëve.
