Interpelanca e thirrur me Kryeministrin Albin Kurti, nga Aleanca për Ardhmërinë e Kosovës për “masat urgjente të Qeverisë në raport me situatën e krijuar në vend” përfundoi me moskalimin e propozim-rezolutës së AAK-së, shkruan gazeta online Reporteri.net.
Seanca u karakterizua me përplasje të akterëve politikë referuar situatës në pjesën veriore të Kosovës pas dorëheqjes së komunitetit serb nga institucionet e vendit që solli vakum institucional dhe të sigurisë.
Ramush Haradinaj nga AAK ka kërkuar që përmes një samiti në ShBA të dialogohet për kthimin e serbëve në institucione bashkërisht me njohjen e ndërsjellë Kosovë-Serbi.
Për boshllëkun institucional, Kryeministri i Kosovës, Albin Kurti tha se punonjësit e komunitetit serb që janë dorëhequr duhet ta mbushin atë me aplikime të reja.
Dorëheqjen e tyre politike, Kurti tha se nuk duhet ndjekur me thirrje politike për kthim. “Duhet të aplikojnë në mënyrë profesionale ata që duan ato vende të punës”.
Derisa opozita argumentonte se brenda 3 muajsh ka arritur të nxjerrë jashtë kornizës institucionale veriun e Kosovës, kryeministri konsideroi se “qytetarët kanë votuar për këtë qasje të re në dialog”.
Një gjë “që duhet ta kuptoni qartësisht”, i tha ai opozitës, është “drejtësia dhe dobia” e qasjes së qeverisë ë tij në dialog.
“Sikur të ishim sikur qeveritë e kaluara, kur vareshin nga Lista Serbe, ndoshta do të kishte mocion mosbesimi pas këtyre veprimeve që kemi bërë, por ja që ka ndodh ndryshimi i madh dhe kjo nuk po bëhet e mundur”.
“Duhet të gëzohemi që Qeveria nuk varet nga Lista Serbe, që jemi pavarësuar nga strukturat ilegale që kanë pasur qëllim destruktivitetin e vendit”.
Kritika e PDK-së
Situatën e krijuar në veri, deputeti i Partisë Demokratike të Kosovës, Enver Hoxhaj e quajti “jo vetëm vakum, por humnerë politike”.
“Situata në veri ka qenë çdo herë komplekse, por pas 5 nëntorit është një kolaps shtetëror”, tha Hoxhaj.
