Mungesa e një qeverie e ka vënë në rrezik edhe miratimin e buxhetit për vitin 2026.
Nëse brenda vitit nuk miratohet projektligji për Buxhetin e vitit 2026, shteti mund të funksionojë vetëm dy muajt e parë me 1/12 e buxhetit paraprak.
Kjo vë në rrezik edhe punonjësit e administratës publike që marrin paga nga shteti.
Sipas statistikave janë 84,7mijë punonjës të sektorit publik që mund të mbesin pa paga që nga muaji mars.
Pjesë e sektorit janë Presidenti, Kryetari dhe deputetët e Kuvendit, Kryeministri dhe ministrat, Kryetarët dhe drejtorët komunalë, Kryesuesit dhe asamblistët komunalë, Punonjësit në sistemin gjyqësor, Punonjësit në sistemin prokurorial, Punonjësit në Forcën e Sigurisë së Kosovës, Punjonjësit në Policinë e Kosovës dhe Inspektoratin Policor, Zjarrfikësit, Punonjësit në Doganën e Kosovës, Punonjësit në Shërbimin Korrektues të Kosovës, Punonjësit në arsimin universitar dhe para universitar, Punonjësit në sistemin shëndetësor, Punonjësit e administratës publike, Ambasadorët dhe të punësuarit në shërbim të jashtëm, Krijuesit dhe performuesit e kulturës dhe artit, Avokatët shtetërorë dhe komunalë, Punonjësit te Avokati i Popullit, Punonjësit në Komisionin Qendror të Zgjedhjeve, Komisionerët për Privatësi dhe Informim, Punonjësit në Komisionin e Pavarur për Media, Auditorët, Punonjësit e Organit Kolegjial, Punonjësit në Njësinë për Inteligjencën Financiare.
Pa para do të mbetnin edhe mbi 330 mijë persona në Kosovë që përfitojnë pensione dhe nga skemat e ndihmës sociale.
Janë 219,9 mijë të moshuar që do të mbesnin pa pension në rast se nuk miratohet buxheti.
21,6 mijë persona që marrin pensionin e aftësive të kufizuara mund të mbesin pa të ardhura.
943 ish-punonjës të Trepçës mund të mbesin pa pensione.
919 ish-pjesëtarë të Forcës së Sigurisë së Kosovës, po ashtu rrezikojnë të mbesin pa pension.
Vihen në rrezik edhe 1400 ish-pjesëtarë të Trupave të Armatosura të Kosovës që nuk mund të marrin pensionet, 1800 pensione të personave që janë pjesë e skemave të të verbërve, 2,5mijë pensione familjare, 30 pensione të invaliditeti në punë, 3,4mijë pensione paraplegjike dhe tetraplegjike, 14,9 mijë pensione për kompensimin e Arsimit për vitet 90/91-98/99, 12,5 mijë pensione të familjeve të dëshmorëve dhe invalidëve të luftës, 37,1mijë veteranë, 16,5 mijë skema e ndihmës sociale dhe 4 mijë Skema për përkrahjen e familjeve që kanë fëmijë me aftësi të kufizuara.
