Grupi i Këshilltarëve të LDK-së në Kuvendin Komunal të Podujevës ka zhvilluar sot një aksion simbolik në sheshin e qytetit dhe para objektit të Komunës, duke vendosur posterë me fotografitë e zyrtarëve që i konsideron përgjegjës për gjendjen e krijuar në menaxhimin e mbeturinave.
Sipas LDK-së, aksioni është organizuar si reagim ndaj, siç e cilëson ajo, dështimit të pushtetit komunal në ofrimin e shërbimit të grumbullimit të mbeturinave. Këshilltarët opozitarë thonë se për muaj me radhë kanë ngritur shqetësime në seancat e Kuvendit Komunal dhe përmes reagimeve publike, duke kërkuar masa urgjente për stabilizimin e Ndërmarrjes Publike “Pastrimi”.
LDK vlerëson se gjendja aktuale është pasojë e keqmenaxhimit, emërimeve politike dhe punësimeve partiake në ndërmarrje, duke shtuar se kjo ka dëmtuar funksionimin dhe qëndrueshmërinë financiare të saj. Po ashtu, partia ka shprehur shqetësim për, siç pretendon, kalimin e shërbimit të grumbullimit të mbeturinave te operatorët privatë pa procedura të rregullta ligjore dhe pa vendim të Kuvendit Komunal.
Në komunikatën e saj, LDK ka kërkuar:
- Shkarkimin e menjëhershëm të Komisionit të Aksionarëve.
- Marrjen e përgjegjësisë politike dhe institucionale nga kryetari i Komunës dhe zyrtarët përgjegjës.
- Ndërprerjen e veprimeve që, sipas saj, dëmtojnë funksionimin e NP “Pastrimi”.
- Hartimin e një plani urgjent për stabilizimin financiar dhe funksional të ndërmarrjes.
- Transparencë dhe llogaridhënie për të gjitha vendimet që lidhen me menaxhimin e mbeturinave.
LDK thekson se qytetarët e Podujevës meritojnë një qytet të pastër dhe shërbime cilësore, ndërsa kërkon masa të menjëhershme për tejkalimin e situatës.
