Lideri i Nisma Socialdemokrate, ka bërë homazhe në Reçak, me rastin e 26-vjetorit të masakrës që ndodhi në këtë fshat.
Nga atje Limaj tha se Masakra e Reçakut është në themelet e lirisë së Kosovës.
“Masakra e Reçakut është në themelet e lirisë së Kosovës, andaj me përkulje nderojmë të gjithë martirët dhe dëshmorët, jo vetëm të kësaj masakre, por të gjithë kombit.
Kemi qenë zëra të paktë që tash e 26 vite kemi ngritur zërin duke kërkuar që të jemi të kujdesshëm me të kaluarën tonë historike që ka sjellë këtë liri. Duhet shohim pse qindra masakra ende nuk janë të hetuara për më tepër kryesit e tyre kanë marrë guximin për t’i mohuar derisa ende vazhdojnë të qëndrojnë në strukturat drejtuese të shtetit serb”, tha Limaj.
Ai po ashtu i bëri thirrje qytetarëve për bashkim në mbrojtjen e të vërtetës.
“Në kohën kur po na sulmohet historia nga katër anët, bëj thirrje gjithë qytetarëve për bashkim në mbrojtjen e të vërtetës që po tentohet të na ndryshohet. Është koha e fundit kur duhet fillohet të kthejmë kokën dhe për ngjarje të tilla të mos kujtojmë e të kujdesemi vetëm njëherë në vit”, tha Limaj.
