Llapi refuzoi ofertën prej 1 milion eurove për Gashijanin

Oferta prej më shumë se 1 milion euro nuk e ka tunduar klubin e Llapit për ta lënë të lirë anësorin kosovar, Elvir Gashijani.

Talenti 18-vjeçar ka pasur oferta këtë merkato për t’ua larguar nga “Zahir Pajziti”, ka pohuar trajneri i Llapit, Tahir Batatina.

Sipas Batatinës, ofertat për Gashijanin ishin në vlerë prej më shumë se 1 milionë euro.

“Po është e vërtetë që oferta e kalon shifrën prej 1 milion eurove, por ne nuk kemi dashur ta largojmë Gashijanin për shkak se ai duhet të fokusohet edhe më tepër te pjesa profesionale dhe duhet të marrë më shumë eksperiencë dhe më shumë minuta te Llapit”, ka thënë fillimisht Batatina.

Trajneri i Llapit ka deklaruar se Gashijani duhet të përmirësohet në aspektit taktik dhe këtë beson se do të arrijë nën urdhrat e tij.

“Ai është duke bërë mirë te Llapi dhe ka filluar të stërvitet më shumë ne pjesën taktike sepse ka ardhur nga gjeneratat e reja dhe duhet të përmirësohet në shumë aspekte. Ka filluar të jetë lojtar vendimtar te Llapi dhe shpresoj se transferimi i tij do ta thyej rekordin e transferimit të Muhamet Hysenit. Shpresojmë se do ta transferojmë në verë në Serie A, pasi që klubet nga atje janë duke e përcjellur”, ka thënë Batatina në Sports Show në Klan Kosova.