Vila e Milan Radoiçiqit, e cila ditë më parë është bastisur nga policia e Kosovës, ka ngritur pyetjen për ligjshmërinë e pasurisë së ish-nënkryetarit të Listës Serbe.
Dhe në këtë drejtim, mediat serbe kanë shtruar pyetjen se si fitoi kaq shumë pasuri “mbrojtësi i serbëve në veri të Kosovës” dhe a është ai një “Pablo Escobar”?
Bëhet fjalë për një vilë me luks të madh në bregun e liqenit në veri të Kosovës – pronari i së cilës është Milan Radoiçiq – siç pohon policia e Kosovës dhe askush nga pala serbe nuk e mohon.
“Është një shfaqje force, në një farë mënyre. Kjo flet vetëm për fuqinë. Krijon një imazh tjetër pushteti, paprekshmëri. E shikon çfarë vile ka, mos u ngatërro me të. Besoj shumë se ai ishte mjeshtër i jetës dhe vdekjes në veri të Kosovës”, ka thënë Millosh Laziq, gazetar i portalit Nova.rs, përcjell Telegrafi
Bëhet fjalë për njeriun i cili së bashku me kumbarin e tij Zvonko Veselinoviq, që nga viti 2013 është i lidhur me shumë afera të dyshimta
Siç vë në pah mediumi serb, objekte të ngjashme kanë tërhequr vëmendjen e publikut në Serbi edhe më parë, përcjell Telegrafi.
Kështu, përmendet një vilë në të cilën janë të praruara bravat, në të cilën veprat e artit kushtojnë shtrenjtë dhe ishte selia e Dushan Spasojeviqit – që ishte kreu i një prej grupeve më të mëdha kriminale serbe në histori, klanit të Zemunit.
E ndërsa në vilën në Shilerova janë investuar 8.5 milionë marka gjermane të atëhershme, ndërtesa e Radoiçiqit është ende në pritje të një vlerësimi. /Telegrafi
