Klinika e Pediatrisë në Qendrën Klinike Universitare të Kosovës po përballet me mbingarkesë të pacientëve, e për këtë arsye në disa dhoma po detyrohen që t’i vendosin nga dy fëmijë në një shtrat.
Për këtë situatë të krijuar në Pediatri, Telegrafi ka kontaktuar me drejtoreshën e Klinikës së Pediatrisë, Violeta Grajçevci – Uka, e cila ka deklaruar se kjo klinikë po përballet me mbingarkesë për shkak të virozave të ndryshme, ku brenda 24 orësh kryhen deri 150 vizita në emergjencën pediatrike.
“Klinika e Pediatrisë si çdo vit në periudhën e njëjtë të vitit përballet me mbingarkesë në punë për shkak të virozave të ndryshme. Gjatë punës 24 orësh në Klinikën e Pediatrisë, gjegjësisht në Emergjencën pediatrike kryhen deri në 150 vizita ndërsa në ambulanta specialistike deri 100 vizita.
Gjatë 24 orëve mund të kemi mbi 30 pranime të cilat në të shumtën e rasteve janë me probleme respiratore. Këto pranime bëhen në bazë të indikacioneve dhe gjendjes klinike të pacientëve.
Ndonjëherë edhe mbingarkohemi me pranime dhe në bazë të kapaciteteve që kemi ndonjëherë detyrohemi të pranojmë edhe nga dy pacient në një shtrat”, deklaroi ajo.
Po ashtu, Grajçevci-Uka tha se shumë shpejt bëhet një triazhim i fëmijëve që kanë nevojë për lëshim në shtëpi dhe lirohen vendet.
Po ashtu, ajo sqaroi se nuk mund të përziejnë fëmijët në reparte të tjera, prandaj ndodh që fëmijët t’i vendosin në të njëjtën dhomë.
“Poashtu ndonjëherë nuk mund të përzihen fëmijët me patologji të ndryshme në repartet tjera. Duke marr parasysh që Klinika e Pediatrisë trajton edhe raste të sëmundjeve të rënda kronike duke komprometuar imunitetin, paraqet problem nëse një fëmijë me probleme respiratore e vendosim në të njëjtën dhomë. Me një menaxhim të duhur të shefave të reparteve dhe mjekëve kjo dukuri në Klinikën re Pediatrisë mund të ndodh shumë shkurt”, ka sqaruar Violeta Grajçevci – Uka.
Tutje, ajo ka shtuar se “qëllimi ynë është që të ju ofrohet fëmijëve shërbimi i duhur dhe profesional aty ku ka nevojë”.
Ndryshe, viroza të ndryshme po qarkullojnë gjatë kësaj kohe, ku më së shumti po prekën fëmijët./Telegrafi/
