Nis aksioni, qentë endacakë dërgohen në strehimore

Komuna e Prishtinës, me vendim të kryetarit Përparim Rama, ka nisur aksionin për dërgimin e qenve endacakë në strehimore të licencuar nga agjencia e veterinës dhe ushqimit, ku do të trajtohen si duhet dhe përgatiten më pas për adoptim.

Nisjen e këtij aksioni e ka përcjellë edhe drejtori për siguri dhe emergjenca, Lulzim Fushtica, i cili tha se ky aksion do të vazhdojë edhe në ditët e ardhshme.

“Ky aktivitet do të vazhdojë për ditët në vazhdim. Qëllimi është që qentë të largohen nga rruga dhe të vendosen në strehimore të licencuar nga AVUK-u, ku do të trajtohen në mënyrë humane, dhe komuna do të vazhdojë të subvencionojë këtë strehimore për qentë që do t’i mbajë, ku do t’i përgatisim edhe për adoptim”, ka deklaruar Fushtica.

Komuna po ashtu është duke e përgatitur rregulloren për trajtimin e qenushëve endacakë, ku përfshihet edhe mënyra se si mund të adoptohet një qen i tillë, të cilin do ta trajtojë falas në çfarëdo kohe veterinari i kryeqytetit në qendrën për trajtimin e tyre e cila gjendet në Hajvali të Prishtinës dhe do të hapet së shpejti.

“Do t’i subvencionojmë edhe qytetarët që janë të interesuar të adoptojnë qentë. Një person që e merr një qen do të subvencionohet me 50 euro në muaj. Qytetarët mund t’i marrin deri në 5 qenushë”, ka deklaruar drejtori për siguri dhe emergjenca, Lulzim Fushtica./sinjali