Tre policët e rrëmbyer të Kosovës nga forcat serbe janë vizituar nga shefi i zyrës ndërlidhëse të Kosovës në Beograd, Jetish Jashari, të cilit i kanë treguar momentin e rrëmbimit nga forcat serbe.
“Në momentin e kidnapimit policët kanë qenë duke ngrënë drekë, afër gropave që bllokojnë rrugët ilegale në Veri. Të dyja gropat janë në territorin e Kosovës. Së paku 200 metra larg vijës kufitare që e ndanë Kosovën me Serbinë. Ata më pas janë dërguar në Beograd, policët kanë theksuar se nuk janë maltretuar fizikisht, por nuk u është dhënë ushqim i mjaftueshëm, vetëm nga një copë bukë dhe jo më shumë”, ka treguar ministrja e Punëve të Jashtme, Donika Gërvalla, e cila në një konferencë bashkë me kryeministrin, Albin Kurti, ka shpalosur informacionet e marra nga Jashari.
Gërvalla ka treguar edhe detaje të tjera sa i përket mbajtjes së tre policëve.
“Nga momenti i masës së paraburgimit prej 30 ditësh ata janë të vendosur në dhoma tek e tek, por qasje nuk kanë në informacion, televizion e të tjera. Trajtimi nga personeli është korrekt, atyre u jepet ushqim në baza ditore edhe pse cilësia, sipas njërit prej tyre është jo e mirë”, tha Gërvalla.
“Dje autoritete e burgut ju kanë dhënë veshje të brendshme dhe aksesor të higjienës. Zotëri Shem Mustafa (njëri nga policët) ka theksuar se i mungojnë ende medikamentet që i përdorë rregullisht për gjendjen e tij shëndetësore dhe se kjo po ia vështirëson qëndrimin në burg”.
Gërvalla pohoi se “përmes ambasadorit Jashari do të përpiqemi që sa më shpejt të sigurojmë medikamentet e nevojshme”.
“Ata janë takuar edhe dje me avokatët mbrojtës. Policët mund të vizitohen nga familjarët e tyre gjatë ditëve të premte, por në ditët në vazhdim do ta shohim sa është e mundur kjo”, deklaroi Gërvalla.
_____________________________________________________________
Policët e rrëmbyer flasin me diplomatin e Kosovës: Ishim duke ngrënë drekë kur u rrëmbyem
Tre policët e Kosovës kanë qenë duke ngrënë bukë në momentin kur janë rrëmbyer nga 15 pjesëtarë të forcave policoro-ushtarake serbe.
Ky është versioni që kanë dhënë vetë tre policët e rrëmbyer për shefin e zyrës ndërlidhëse të Kosovës në Beograd, Jetish Jashari, i cili i ka vizituar këtë të martë policët.
Çfarë saktësisht kanë thënë policët e ka bërë të ditur kryeministri i Kosovës, Albin Kurti, i cili në një konferencë për media tregoi se ka biseduar me ambasadorin Jashari.
“Jetish Jashari i ka vizituar të tre policët që po mbahen peng nga Serbia. I ka vizituar ndaras dhe përshkrimi i tre policëve se si ka ndodhur rrëmbimi është i njëjtë, janë tri përshkrime identike të tre policëve; ata kanë qenë duke ngrënë drekë në një tryezë të improvizuar kur 15 persona i kanë rrethuar, sulmuar dhe rrëmbyer. Që të tre e thonë rrëfimin e njëjtë kur pyetën ndaras. Kjo heqë çfarëdo dileme edhe për ata që dëshirojnë të jenë skeptikë”, deklaroi Kurti.
“Vendi ku ndodhet tryeza e ngrënies është 7 metra nga vetura e policisë, pra në atë vend ku e kemi theksuar qysh me datën 15 qershor”, tha Kurti.
“Ne jemi në të drejtën tonë dhe dëshmitë të që posedojmë dokumentojnë qartë se zyrtarët ishin brenda territorit të republikës, në punën e tyre, në luftim të kontrabandës”.
Kryeministri ka kërkuar nga “faktori ndërkombëtar, SHBA, BE dhe NATO, që ta dënojnë agresionin e Serbisë që paraqet edhe shkelje të pikës 4 të marrëveshjes tekniko-ushtarake të Kumanovës të vitit 1999”.
Lajmi në përditësim..,.
