Nga java e shkuar, rrugët që çojnë në pikëkalimet kufitare mes Kosovës dhe Serbisë në Bërnjak e Jarinjë janë bllokuar nga barrikadues serbë, që po protestojnë pas arrestimit të ish-policit Dejan Pantiq i cili dyshohet për sulmet ndaj zyrtarëve të Komisionit Qendror të Zgjedhjeve në komunat e veriut, në përpjekjet e shtetit për t’i organizuar zgjedhjet që fillimisht ishte paraparë të mbaheshin më 18 dhjetor, e që më pas u shtynë për shkak të tensioneve, shkruan Gazeta Sinjali.
Serbët në veri të Kosovës ka tetë ditësh që kanë bllokuar të gjitha rrugët duke vendosur barrikada në Rudarë, Sërboc, Sllatinë dhe Leshak, në rrugën kryesore Prishtinë – Rashkë.
Pjesëtarët e Policisë së Kosovës po vazhdojnë patrullimin e tyre nëpër zonat me popullatë të përzier në veri të Mitrovicës, duke iu ofruar siguri dhe rend.
Zyrtarët policor kanë mbetur në anën tjetër të barrikadave serbe në veri të vendit tash e tetë ditë po përballen me mungesë të ushqimit.
Sipas deputetit të PDK-së, Rashit Qalaj, policët nuk kanë mundësi të mbajnë as higjienë personale për shkak të kushteve minimale.
“Në bazë të informatave qw i kam nga disa polic, policët që janë në stacionin e Leposaviqit shujtën e fundit që ju ka dorëzuar ka qenë dita e diel. Nga dita e diel ata janë duke i përdorur ato shujta që ua kanë dërguar pra ka informata që buka ka filluar të hargjohet. Nuk kanë mundësi t’i ndërrojnë rrobat dhe paraqitet rreziku për sëmundje infektive dhe duhet sa më shpejt që është të mundur të merret vendimi i largimit të këtyre barrikadave”, tha Qalaj.
Ai shtoi se policët janë urdhëruar që të mos flasin për ankesat e tyre.
“Informacionet që i kam, policët janë urdhëruar që të mos flasin, dhe ata po ashtu kërkojnë edhe ndihmën e mediave që të raportojnë për këtë meqenëse sipas tyre (policëve), nuk janë duke parë interesim nga mediat për të raportuar për këtë gjë”, u shpreh ai.
Ankesa janë drejtuar edhe nga Sindikata e Policisë së Kosovës të cilët nëpërmjet një komunikate për media njoftuan se policët kanë mbetur të bllokuar në Jarinjë dhe Leposaviq dhe se iu është pamundësuar ndërrimi.
“Me të njejtin qëllim qëndrojnë zyrtarët policorë edhe në dy lokacionet e veriut të vendit, në Leposaviq dhe Jarinje ku janë të bllokuar nga barikadat e vendosura nga grupe jolegjitime kriminale. Bllokimi i rrugëve ka hyrë në ditë në tetë dhe si pasojë është cenuar lëvizje e lirë e qytetarëve dhe organeve të rendit dhe zyrtarët policor në Leposaviq dhe Jarinje kanë mbetur të bllokuar pa pasur mundësi t’ju bëhet ndrrimi sipas rregullave për funksionim normal”, thuhet në njoftimin e sindikatës.
